Dalawang Tulang Lasing

UNA: Sa matagal at nawawala kong pag-ibig

Kung naririnig mo ako,
magparamdam ka,
utang na loob, labas at utang pandaigidig naman!
Iniisip na kasi ng marami
na inimbento lang kita,
kahit totoo,
malay naman nila di ba?
Kaya kung sakaling andiyan ka,
sa labas ng isip ko,
wag ka lang multo,
o isang jologs na naka-rugby sa may Cubao,
tawag ka naman.
Sana maganda boses mo.

PANGALAWA: Para kay Ariam

Nakainom na naman tayo.
May pag-ibig ka na bang pinaglulunuran ng alak?
O sinasabayan mo lang ako?
Naaawa ako sa iyo minsan,
kapag hindi ako galit,
madalang pero sa minsang yon talaga,
gusto kong umiyak at yakapin ka.
Kung maiibsan ko lang ang hapis mo
sa iyong pusong aalog-alog sa hangin,
ginawa ko na.
Kung masisikil ko lang ang
hininga mo, Ariam,
tinapos na kita.
Pero di ko talaga kaya.
Galit ako sa iyo, eh.
Kasi may puso ka,
ako wala.